დაწყება

მონიტორინგი, შეტყობინებები და ლოგები.

მეხსიერების, CPU-ს, პასუხის დროისა და ტრაფიკის გრაფიკები, მდგომარეობის შემოწმების გზა, შეტყობინებები, რომლებსაც ვაგზავნით, და ყოველი სერვისის ლოგები 7 დღის განმავლობაში ძებნის შესაძლებლობით.

2 წთ კითხვა

პროექტის ყოველ აპლიკაციასა და ყოველ სერვისს აქვს მონიტორინგის და ლოგების ჩანართები. არც ერთისთვის არაფრის დაყენება არ გჭირდებათ.

მონიტორინგი

აირჩიეთ პერიოდი — 1 სთ (წერტილი ყოველ წუთში), 24 სთ (5-წუთიანი საშუალოები) ან 7 დ (15-წუთიანი საშუალოები). გრაფიკები:

  • მეხსიერება — გამოყენებული მეხსიერება, იმ ქეშის გარეშე, რომელსაც სისტემა თავად ათავისუფლებს, სერვისის ლიმიტთან შედარებით.
  • CPU — ბირთვების დატვირთვის წილი; 100% ნიშნავს, რომ ყველა ბირთვი დაკავებულია.
  • პასუხის დრო — რამდენ ხანში პასუხობს მდგომარეობის შემოწმება; მოწმდება ყოველ წუთში. პერიოდში ჩავარდნილი შემოწმებების რაოდენობა გრაფიკის ქვემოთ ჩანს.
  • გამავალი ტრაფიკი — მონაცემები, რომლებიც სერვისმა ინტერნეტში გაგზავნა; პროექტის სერვისებს შორის ტრაფიკი არ ითვლება. ქვემოთ: ამ თვის შემომავალი და გამავალი ტრაფიკი.
  • ინსტანსები — რამდენი ინსტანსი მუშაობდა, თუ სერვისს ერთზე მეტი აქვს.

მიმოხილვაზე ასევე ჩანს პროექტის ყოველი სერვისის მიმდინარე მოხმარება, ბოლო 5 წუთის ხაზით.

მდგომარეობის შემოწმების გზა

ყოველ წუთში ვხსნით თქვენი ვებ-სერვისის ერთ გვერდს, რომ გავზომოთ პასუხის დრო და გავიგოთ, პასუხობს თუ არა. ნაგულისხმევად ეს მთავარი გვერდია. საუკეთესოა გვერდი, რომელიც სწრაფად, მძიმე სამუშაოს გარეშე პასუხობს — მაგალითად, მარშრუტი /health, რომელიც OK-ს აბრუნებს.

შესაცვლელად: მონიტორინგი → გზის შეცვლა, ან პარამეტრები → მდგომარეობის შემოწმება. გზა იწყება /-ით, არ შეიცავს ჰარებს და მაქსიმუმ 200 სიმბოლოსგან შედგება.

შეტყობინებები

გაცნობებთ ელფოსტით (და Telegram-ით, თუ ის დაკავშირებული გაქვთ), და კიდევ ერთხელ, როცა ყველაფერი ნორმას დაუბრუნდება:

მოვლენაროდის
აპლიკაციამ ან სერვისმა პასუხი შეწყვიტამდგომარეობის შემოწმება ვერ გაიარა, ან სერვისი გამუდმებით ჩერდება
დაგეგმილი ამოცანა შეცდომით დასრულდაგაშვების შემდეგ, მისი შედეგით ლოგში
მეხსიერების მაღალი მოხმარებალიმიტის 90%-ზე მეტი 10 წუთის განმავლობაში
პროცესორის მაღალი დატვირთვაბირთვების 90%-ზე მეტი 15 წუთის განმავლობაში
მონაცემთა ბაზის დისკი ივსება80%-სა და 90%-ზე, და როცა სავსეა
ტრაფიკიპროექტის ფასში შემავალი ტრაფიკის 80%-სა და 100%-ზე
განთავსება ვერ დასრულდაწინა ვერსია აგრძელებს მუშაობას

მეხსიერების ან პროცესორის მაღალი მოხმარება არასოდეს აჩერებს არაფერს — ეს ნიშანია, რომ სერვისს მეტი რესურსი არ აწყენდა (პარამეტრები → რესურსები).

ამ მოვლენების თქვენს გუნდზეც გასაგზავნად — Slack-ში, Discord-ში ან webhook-ზე — გამოიყენეთ პარამეტრები → შეტყობინებები გუნდისთვის. იხ. განთავსებები.

ლოგები

ლოგების ჩანართზე ჩანს ყველაფერი, რასაც თქვენი აპლიკაცია ბეჭდავს — სტანდარტულ გამოსავალსა და შეცდომების ნაკადში.

რეალურ დროში

რეალურ დროში ახალ სტრიქონებს მათი გამოჩენისთანავე აჩვენებს. სტრიქონების ფილტრი მათ ერთი სიტყვით ავიწროებს. აირჩიეთ პროცესი: საიტი, ერთ-ერთი ფონური ვორკერი ან განრიგი დაგეგმილი ბრძანებებისთვის. რამდენიმე ინსტანსის შემთხვევაში თითოეულს საკუთარი ლოგი აქვს.

ისტორია და ძებნა

ლოგები 7 დღე ინახება. აირჩიეთ პერიოდი — ბოლო 15 წუთი, ბოლო საათი, ბოლო 6 საათი, ბოლო 3 დღე, ბოლო 7 დღე ან სხვა პერიოდი — და ველში ლოგებში ძებნა აკრიფეთ, რასაც ეძებთ.

  • ფილტრი დონის მიხედვით: შეცდომები, გაფრთხილებები და შეცდომები, ინფორმაცია და ზემოთ ან ყველა დონე. დონე ჩანს, თუ სტრიქონში მითითებულია (როგორც ფრეიმვორკების უმეტესობა აკეთებს).
  • ძველი სტრიქონების ჩატვირთვა უფრო ადრინდელ ჩანაწერებს აჩვენებს.
  • ჩამოტვირთვა პერიოდის სტრიქონებს ფაილად ინახავს.

როცა რაღაც ფუჭდება

თუ განთავსება ვერ სრულდება ან სერვისი წყვეტს მუშაობას, ამ შეცდომის ახსნა კითხულობს ლოგის ბოლო სტრიქონებს და გთავაზობთ სავარაუდო მიზეზს და მის გამოსწორებას თქვენი სტეკისთვის. იხ. დეველოპერის ინსტრუმენტები.

ყოველი განთავსების აწყობის ლოგი განთავსებების ჩანართზე რჩება.

ჯერ კიდევ გაქვთ კითხვები?

მოგვწერეთ ჩატში — AI მაშინვე გპასუხობთ, საჭიროებისას კი ინჟინერი უერთდება, დღე-ღამის ნებისმიერ დროს.

მხარდაჭერასთან დაკავშირება